Qalq Ayaqqa!-Eskender Fazıl
Kuçük halqsıñ, seniñ buyük tarihıñ
Qaar-qayğı, azaplardan sarardı.
Gayet agır, meşakatlı taqdiriñ
İftira ve faciadan qarardı.
Aq-uquqtan seni mahrum eterek,
Kozyaşıña qara qanlar qattılar.
İrkilmeden esirlikke çekerek,
Seni cennet Vatanıñdan attılar.
Qara deñiz dalgalanıp, okürip,
Ateş tüşken yurtum içün çagladı.
Qart Çatırdağ azaplanıp, okünip,
''Qayda kete Tatarlar?''-dep agladı.
''İz qalmasın Qırımtatar adından!''-
Deseler de, varlıgıñnı saqladıñ.
Yıllar keçti, istiraplar içinde
Merd kureşnen şerefiñni aqladıñ!
Mezarlarıñ tolsalar da şeitnen,
Kureş azmiñ yorulmadı-talmadı.
Yer yüzünde facianı bilmegen,
Añlamagan insan endi qalmadı.
Qalq ayaqqa! Koter egik başıñnı!
Gurur ile yaşa ana-Vatanda!
Yeter endi: sil kozüñniñ yaşını-
Şan ve şuret layıq seniñ adıña!
Qalq ayaqqa! Seni Vatan çagıra!
Bekley seni sönip qalgan ocaqlar.
Tamırıñnı pekit ulu Çatırga-
Vatan seni algış ile quçaqlar!
1987 s. Moskva
Hiç yorum yok:
Yorum Gönder