Kene Satqın Dediler-Yunus Qandım

...Kene Satqın Dediler

Maña buguñ kene satqın dediler,
Yıltıratıp taşladılar lekeni.
O birsi kun menim ile yurgenler
Kesip attı maña tiygen etekni.

Men Tatarım,maña satqın demeñiz,
Ana sütü kibi aqtır vicdanım.
Bu dunyada, em de o bir dunyada,
Qur'an opem,yoq menim qabaatım.

Men Tatarım,menim Tatar başıma
Engen nice-nice darbe,kulfetni
Ne İvanga,ne Ergaşqa,Aşotqa
Tilerim men vatansızlıq,gurbetni.

Saba tursam,bismillanen vatanıma
Yol aramaq içün çıqam evimden.
Neler kelir,neler kelmez,bilmeyim,
Menim qamış kibi zayıf elimden.

Epsi bir men tırmaşam sarp daglarga,
Ruzgar meni uçura bir pufdayın.
Qanatları qırılgan bir quş kibi
Yatam yerde zayıflıqtan aglayım.

Quvetsizlik meni iç de qorquzmay,
Vaqtı kelir,qartal kibi uçarım.
Hor Qırımnıñ mensiz yatqan taşına
Cehennemden qaytıp kelip qonarım.

Menim tutqan yolum aqtır,dostlarım,
Men sürünsem,men yıqılsam,tepmeñiz.
Tepilmekçün dogmadım men,dogmadım,
Boten yerde eteklerni kesmeñiz.

Men yaşayım,lakin vatan yolunda
Taydırsañız bile taymam,taymam men.
Men Tatarım,Tatarlıqtan vazgeçmem,
Keder etmeñ, vatanıma qaytam men.

06.05.1990