13 Aralık 2008 Cumartesi

Aşıqam

Yarı gece... Etraf çım-çırt,
İşlerimniñ soñu yoq.
Suvday aqqan daqqalarım,
Szige yanam,tarsıqam.
Kirpiklerim tüyürlene,
Munar basa. Kene de
Yuqlamaga degil de men
Uyanmaga aşıqam.

Saña şimdi vaqıt qayda,
Sarma yuqu yurekke!
Nasıl qalib yuqlar boyle
İşlemege kerek de?!

Aydın hayal,hoş niyetler
Tolu ekeç gonülde,
Tartma yuqu meni kerii
Men yatmaga degil de,
Saar yeli teprengende,
Keñ togaylar boyunda
Quşçıqlarnıñ coşturıcı
Yırlarına aşıqam.
Mavı mermer qayalarnıñ
Suvuq,susqun bagrında,
Asırlarca buzlap yatqan
Sırlarına aşıqam.

Hoş saarniñ qoqu saçqan
Yelçigine qatılıp,
İlniñ ilham bagçasını
Dolanmaga aşıqam.
Tüz yalıda mor deñizniñ
Quçagına atılıp,
Dalgalarnıñ kumüşine
Bulanmaga aşıqam.

Bu esapsız fikirlerden
Şay yorulgan başımnı
Men yastıqqa salsam bile
Yuqlamaga degil de,
Kene gonul tarta meni
Talmay hızmet etmege
Qaruv bergen oz halqıma
Aziz,azat İlimde.

Can ıncınıp,tasa basıp,
Yurek cılap turganda,
Yuqlamaga istek qayda,
Uyanmaga istek qayda,
Ey,qıyılmaz dakikalar,
Koz yuquga ketmeden,
Dostlarımnı tañ atmadan,
Uyantmaga aşıqam.

Hiç yorum yok:

Yorum Gönder