Bu-Kezlev Qapısı !..-Şer'yan Ali

Bu-Kezlev Qapısı !..-Şer'yan Ali

Qoşma

Bu Kezlev qapısı, miras qapı bu,
Dersiñ, buyük kitap, keçmiş ğayıbı.
Bu-dedeler tüsi, ozgün yapı bu,
Mazimiz conkinden süslü saife.

Ecnebiy qolundan qırılğan qapı,
Saipleri kibi sürülgen qapı.
Halqımız qaytğan soñ tirilgen qapı,
Asıl temeline kene quralğan.

Aşıq Umer izin seçem keçkende,
Dalğa-dalğa ilham sezem keçkende.
Nazm inclerin tizem keçkende,
Ulular ruhunıñ şavlesi qalğan.

Aziz evliyalı, erenli yer bu,
Nesilim temeli, elemli yer bu.
Nomanlı, Eşrefli, melemli yer bu,
Tamırların bular terenğe dalğan.

Nadir tekiede kene zikirler,
Şeryannıñ dilinde soñsız şukürler.
Kezlevden saz yırın ketire yeller,
Aşıqtır Vatanın bağrına alğan!..

07.05.2006, Kezlev


Noman: Noman Çelebicihan
Eşref: Eşref Şemizade