Keleler-Bekir Sıdkı Çobanzade

Keleler-Bekir Sıdkı Çobanzade

On yaşımda kiçkene çoban edim.
Yayla astında çalaşım kurgan edim..

Hava açık, kök yüksek, rüzgar taya..
Aydın, ayrı körüne tavlar, kaya..

Uzak yoldan ötken atnıñ ayak sesin,
Yaş özenniñ kır astından şay ötmesin,

Men bir kırga uzanır, tıñlar edim,
Baraklarman, koçlarman çıñlar edim.

Bu gün endi kök bulut, rüzgar kattı,
Rüzgar meni yayladan şeherge attı..

Özençikniñ suvından içalmayman,
Atlılarnı uzaktan seçalmayman..

Lakin çıksam yañgızlık çatırına,
Kirsem yigit yaşlarnıñ sırlarına,

Duyaman men, bilemen atlılar yolda..
Kır aşarlar kelecek kaplan yılda..

Atlarında yeger yok, atlar oynak!..
Saçları gür, turalmay hiç bir kalpak!..

Sarışın, esmer kızlarman saf kurganlar,
İçlerinde yok talgan boldırganlar..

Tülbendsiz kızlar, örtecek ayıbı yok.
Kaygısız kızlar, ceyizden gayıbı yok.

Keleler yolda toz duman at patlatup,
Meşçanlarnıñ korasın tez atlatup..

Közleri od, yürekler saglam, temiz
Hepsi kardaş, her biri oy da egiz..

Atları kişniy tarihge, kölgelerge,
Nal yarıgı şavk bere ülkelerge..

Bugün kelir diy göñül, yarın belki?
Halkda, fende köb sual olarnı bekliy.

Kelgencek olar men dertten tozacakman,
''Tavşan yılı'' da el üstünden ozacakman..

Olarnı men köb kütdüm kün batkanda,
Konşularga al-kızıl tañ atkanda..

O kızlarnı men kördim, köralmay süydim,
Olarnı bekleb gizliden candım da küydim.

Dostlar meni kömüñizol katına!..
Kayerde yigit su bere ker atına..

Aytıñız yaşlar yetişse toktasın teran,
Mezarımda saf baylap tepsünler koran!..

Keleler yolda.. yırları yürekke tiye,
Kalemimden bu yırlar kagıtka iye..


Akmescid, 22.12.1922