Tuvğan tilim, milliy ruhum, yurtqa sevgimni
Yuregime aşadıñ sen gençligim zaman;
Halqımnen bir keçirdim zor, mudhiş sürgünni,
Ant etkenniñ antınen men sençünim er an...
Kozyaşlarnen, zulumlarnen ayırğan yollar
Qırq altı yıl mesafeden döndire saña,
Çevremizde dolansa da, ep muşkül allar
Yoldaşmız biz-azat millet geceden tañğa...
Kederimden kotüririm vahşiy GULAGda
Ne yerdedir ğayıp olğan qart, hor anamnı,
Yeşil Qırım maqamını taşıp qulaqta,-
Cenkten kelip, sürgün olgen mayor ağamnı.
Garip umüt asretine qavuşır ille
Qırımlılar biri qalmay türlü çağında,
Em, inşalla, merhumlarnıñ ruhları bile,
Gurbetlikten ketecektir aziz bağına...
Sen Solhatsıñ, Hansaraysıñ, ey, Qırımstan,
Gazaiysiñ, Aşıq Umer, Bikeç, Giraybay...
Çorabatır, Alimsiñ sen, Amethan Sultan...
Gizlenilgen tarihıñ nam, şuretlernen bay!
Hırpalanğan, söndirilgen variyetleriñ,
Bastırılğan, yoq etilgen qabristanlarıñ,
Dedelerden saqlı qalğan vasiyetleriñ-
Evlatlarıñ kelüvine muhtac añlarıñ...
Unutmadıq ecdatlarnıñ miras sözlerin:
Yeşil adam.
Kok ızanlar qulan Çoñğarım.
Qara, Azav deñizlerde mor saillerim.
Bağ-bağçalı mucizeli ormanım-Qırım!
İşte, mağrur tabirleriñ Qadimden qalğan
Gaspıralı İsmail Bey toprağı Vatan!
Efsaneler, çıñ-maneler, em İcret yırın
Qısmet ise, bekle biznen muqaddes QIRIM!
Hiç yorum yok:
Yorum Gönder