Samarqand
Medreseler, sırlı, qadim mezarlar
Otmüşlerge hayalımnı tartalar.
Er koşede alicenap izler bar,-
Er birisi efsaneler aytalar.
Qart ozbekniñ kokregiday çıdamlı
Turuşuñnı yeller, seller bukmedi.
Ayt, Samarqand, taliyiñde tumanlı,
Afaqanlı saifeler çoqmı edi?..
Qaysı çinar salqınında Ulugbek
Sabaları hayal sürip çay içti?
Ne eyledi, neler etti Timurlenk.
Yollarıñdan nice kervanlar keçti?
Qart Samarqand, bukülmegen beliñde
Tükenmeyceq, devler kibi quvet bar.
Aydın nurlu taliyiñ oz eliñde
Saña şuret, saña sayğı , urmet bar.
Hiç yorum yok:
Yorum Gönder