Mercan Daneleri- Şeryan Ali

Mercan Daneleri- Şeryan Ali

Mercan daneleri oyle qırmızı,
Dersiñ, qatıp qalğan qan tamçıları.
Olar ya kuneşniñ kulte-topuzı,
Ya da şairlerniñ ilhamcıları.

Meftüni oldım, bu al incilerni
Korip qartanamnıñ qollarında men.
Şimdi hatırlayım keçken yıllarnı,
Çıqıp otmüşimiz yollarına men.

Tavuqqa yem sepe edi qartanam,
Yipçigi uzüldi, saçıldı mercan.
Cıyıp alamadım, yanıqnen añam,
Olarnı çöpledi tavuqlar aman...

Qartanam okündi mercanlarına,
Oña anasından ediye eken.
Ne miras qaldırır torunlarına,
Keçmişine nasıl çekecek yekün?..

Mercan daneleri-umüt taşları,
Artımızda qalğan yıllar bağıdır.
Ecdatlar kozüniñ qatqan yaşları,
Nasıl evlad onı coyar, dağıtır?

Ala mercanımnıñ tolmay sırası,
Canım raat olmaz bir top olmasa.
Tüşümde berile maña bazısı,
Canım raat olmaz sıra tolmasa.

Mercan savdasıyım, mercan aşığım,
Mercanlar qadrini pek bilerim men.
Mercanlar keçmişim, ogde yaşlığım,
Mercanlar sırasın tekmillerim men!..

1982