Bağçasaray-Şakir Selim

Bağçasaray-Şakir Selim

Yeşil caplar arasında esken yelin
Tar sokaklı maallelerde kimni aray?
Neçün kurup kaldı sırlı çeşmelerin?
Söyle mana, Bağçasaray, Bağçasaray?

''Çürük Suv''nın boylarında tamır atkan
Selbilerin neçün ösmey, neçün kavray?
Otuz eki ay-yıldızın kayda batkan?
Söyle mana, Bağçasaray, Bağçasaray?

Yigirminci asırdan da merametsiz
Bir asırnı kördüm eken bu Hansaray?
Tarihinde yıl oldumu dert-zametsiz?
Söyle mana, Bağçasaray, Bağçasaray.

Beftanlardan kamburaygan kutsız kibi
Alçak-campik evler kimden imdat soray?
Kimler edi bu evlernin öz sahibi?
Söyle mana, Bağçasaray, Bağçasaray.

Kimler edi bu caplarda koy cayratıp
''Top kayanın'' kölgesinde kaval çalgan?
Allı-pullu feslerine guller takıp,
Gugüminen çeşmelerden suvlar alğan?

Kayda şimdi o yosmalar? Ne yerlerde
Çalargan ve siyrekleşken saçın taray
Sen olarnı hatırladın nice kere?
Söyle mana, Bağçasaray, Bağçasaray.

Rast kelirdim bir yosmanı sokagında,
''Merabanız...''dedi, kaşı-közü kara,
Karadeniz dalgalandı ten-kanımda,
İnan buna, Bağçasaray, Bağçasaray.

Afu eyle, sana tanış olgan tilde
Böyle sözni eşitmedin nice zaman.
Biz epimiz ırak edik tuvgan ilden
Asretlikte öleyazdık aman-aman

Öleyazdık dertke derman tapalmayıp
Hastalıgı gizli olgan biçareday.
Sen de taldın icranlıkta yıllar sayıp,
Çok yıprangan Bağçasaray, Bağçasaray.

Bu künge de takdirime bin evalla!
Yettim sana boranlarga ogray-ogray.
Sevem seni olsan bile nasıl alda,
Bağçasaray, Bağçasaray, Bağçasaray