Noğaynıñ Adağı-Memet Nuzet

Noğaynıñ Adağı-Memet Nuzet

Acılıqtan qaytqanda bay bir noğay
Parohodda pek yaman dalğağa oğray.
Avdarıla curegi, döne başı.
Tüşe cerge burçaqday kozüniñ yaşı.
Pek tartışıp qusqanda, adaqlar aday,
Dey: qırq qoyum sadaqa, tek qurtar huday.
Aytqan sözüm iç yutmam, erdirmen men,
Hayrat içün qurarman bşr celtirmen.
Coq-colağan bedava tartsınlar un,
Cağarları yoqlarğa berermen odun.
Borcğa tükyan açarman, bedava furun,
Saña dep, mevlam, aytaman içimniñ sırın.
Süyer qulıñ, mollağa cabayım bir ton,
Adaqlarım etmesem , qatseñ et soñ.
Ayt, şu yavur deñizgei quturmasın.
Men garipni oldürip oturmasın.
Alla başım, bedenim, cureçigim,
Sabiylerim, evladım, Zoreçigim.
Neçün çıqtım men, matüv, oz koyimden,
Keşke olüm çıqqaydı cıllı uyümden.
Yavaş-yavaş cel tına, eksiy dalğa,
Noğay garip, kelip bir aruv alğa
Dey: tükyanı, furunı boştır onıñ,
Mollağa da ne şikãr cartı tonıñ.
Al bir cartı celtirmen qataytayım,
Bedava, dep onı elge nasıl aytayım?
Degeniñday tirmenci tapıla qoymaz,
Tapılsa da az şeynen qarnı toymaz.
Aman-esen qurtulıp kelsem bir kun,
Şu qırq qoynıñ otuzın çalmaq mumkün.
Otuz deymen, til taya, on deycekmen,
Yoq, pıçaqnı beş qoyğa silteycekmen.
Parohod da yaqınlap cete çetke,
Noğay kozün pek tikip skele betke
Dey: ey, mevlam, qurbannıñ birisi ceter.
Etken kişi hayratnı şaytıp eter.
Yanaşqan soñ parohod çetke cetip,
Noğay çıqa er kesni ziy-çuv etip.
Dey: aldatıp Tañrını derya keçtim.
Endi alay adaqtan men vazgeçtim.

1926 s.