6 Ağustos 2011 Cumartesi

Türküli Namaz- Memet Nuzet

Bir vakıtta bir cayil caş sümelikten bezgende
Belki bir şiy tabarman dep, köy dolaşıp gezgende,
Tatar bolgan bir köyşikte toktay o bek boldırıp
Cemaatka maktay özin, avızın pek totırıp
Pakılday şu küni onda kelgen oraza ayı.
Söz birlikmen avız capkan pikaresi em bayı.
Diyler: bare, bizge bir ay siz imamlık etiñiz,
Akka bolgan borcımızdan azat etip ketiñiz.
O caş ta diy:mümkün sizge tek teravi kıldırmak,
Bolmaz sizni Rabbimizge böyle borclı kaldırmak.
Er üyden siz berirsiniz maga birer tanaşık.
Soñ sizlerge sırat keniş, cennetlerge col aşık.
Akşam bola, iftardan soñ halk camige toplana
''Efendi'' de o caminin mihrabına saplana
Köroğlu'nı, Edige'nı okıy tatlı ezgi men,
Cemaatka munasebet kalmay eş te bezmege
Alay bolay teravini bir kararman pitire
Amma halknıñ yüregine aruv tesir ketire.
Türli şın man, türkiler men geşire o kaş afta,
Şo künlerde kele köyge bek maktavlı bir sohta.
Teravide köre-imam- türkilerni patlata.
Sohtanıñ bo edepsizlik yüregini şatlata
Şay da bolsa, ses şıgarmay, lakin yürek talpına.
Namazdan soñ, imamga diy:aytayım köyniñ halkına.
İmam da diy:ses şıgarma, mında altmış tana bar,
Bayramdan soñ satarmız da, üleşirmiz barabar.
Sohta diy:kara, aramızda asıl boldı muabbet,
Ses şıgarman, korkma dostım, sen işine devam et,
Sohta kete, o caş kalıp, ep kıldıra namazın
Cırlay gene öz türkisin, şala gene o sazın
Bayram küni sohta kelip, tanallarnı aydaylar
Col boyında em sekire, em şala, em oynaylar.
İmam satıp ayvanlarnı, cepke sala parasın,
Köstermiy eş sohtaşıkka, ne yazı ne turasın.
Diy: ne yapsam, özim yaptım, em sarf ettim köp emgek.
Bo emgeknıñ yarısın saga bermek ne demek?
Aydav akkı bermek mümkün, ma, istesen bir kümiş.
Sohta boga aşulanıp, diy:yapacam, kara, bir iş!
Cemaatka anlatayım sen onlarga ne yaptıñ?
O caş ta diy:aman sen korkımızga iş taptıñ
Bilgenıñnı eş artına atma, dostım, sohtaçık,
Bar, toktama, dört canına karamay ket, col aşık.
Sohta ketip cemaatka ayta onıñ etkenin
Em bir aylık ibadetnıñ boş boşına ketkenin.
Cemaat ta diy ke: biz de ondan artta kalmadık
Bek köbimiz bir aygaşı eş te abdest almadık.

Hiç yorum yok:

Yorum Gönder