Fetislam Anatoliy Abilov-Sovyetler Birliginiñ Qaramanları-Ablaziz Veliyev

Fetislam Anatoliy Abilov-Sovyetler Birliginiñ Qaramanları-Ablaziz Veliyev

Altın Yıldız saibini buldı

Fetislam Anatoliy Abilov 1915 senesi mart 15-te Cankoy rayonındaki Cadra Şeyh-Eli koyunde doğdı. 1936 senesi orduğa çağırıldı. 1941 senesiniñ sentyabrinden Galebe kunüne qadar cenkte oldı. 26 yaşında polkqa komandirlik yapıp başladı. Defalarca yaralandı ve kontuziyağa oğradı.

4 kere Qızıl Bayraq, III dereceli Suvorov, III dereceli Kutuzov, Lenin ordenlerinen taqdirlendi. 1975 senesi Galebeniñ 30 yıllığı munasebetinen Sovet delegatsiyası erkanında Polşada oldı. Polşa ukümeti F.Abilovğa Polşanıñ aliy mukafatı- Graf Pombreklo altın medalini taqdim etti. Eki kere Sovetler Birliginiñ Qaramanı unvanına taqdim etildi. Lakin tek Ulu Galebeniñ 45 yıllığı qayd etilgen kunlerde (1990 s.), niayet, oña Sovetler Birliginiñ Qaramanı unvanı berildi.

Bugunde yekane sağ Qaramanımız Fetislam Abilov Moskva yaqınındaki Jukovskiy şeerinde yaşay.

Qorantasında doquz can olğan Abil aqaynıñ oğlu Fetislam otuzuncı seneleri Kerçke ketip, anda maden zavodında işley. Soñra koyge qaytıp kele ve 1936 senesine qadar koyde traktorcı olıp çalışa. O yılı da onı orduğa alalar. Hızmetini Garbiy Ukrainada başlay. Başta polk mektebinde tasil ala ve serjant unvanınen onı bitirip oz diviziyasına qaytıp kele. Olarnı diger bir yerge avuştıralar. Oña ise arbiy oquv yurtunda oqumaqnı tevsiye eteler. Boyleliknen Gurcistanğa ketip, anda piyadeler arbiy oquv yurtunda tasil ala.

O daa oquğan vaqıtta Halhın-Golde cenk tutaşa. Eñ yahşı oquğanlardan bir gruppasını andan Uzaq Şarqqa yollaylar. Olarnıñ arasında Fetislam da bar edi. Yaş komandir leytenant unvanında vzvod komandiri olaraq hızmet etip başlay. Aradan 2,5-3 ay keçken soñ onı rota komandiri etip tayinleyler.

Ekinci Dünya cenki başlanğanda Abilov Blagoveşensk şeerinde edi. Anda yañı diviziyanı meydanğa ketire ediler. Diviziya tekmillengeninen onı uruş meydanına yollaylar. Bir qaç kun keçer-keçmez olar Tula şeeriniñ civarına kelip çıqalar. Bu vaqıtta endi batalon komandiri olğan kapitan Abilov ve onıñ siladaşları ogünde duşmannı Moskvağa keçirmemek vazifesi qoyula.

Volokolamsk şossesini qorçalağan vaqıtta polk komandiri elak ola. Fetislam polkqa komandirlikni oz uzerine ala. Boyle yuksek vazifede olğanına baqmadan yanına işançlı askerlerni alıp, ozü razvedkağa bara, nemselernen yuz-yuzge kelip, cenkleşe, onlarnen faşistni oldüre. Başqa bir koyni azat etüv vaqıtında kene duşmannen tutuşa. Bu sefer endi olarnıñ yuzge yaqın adamını gayıp ete, sağlarını esir ala. Neticede, cenk meydanında kostergen yararlıqları içün 1942 senesiniñ kuzünde onı Qızıl Bayraq ordeninen mukafatlaylar. Bir aydan soñ ise resmiy surette polk komandiri etip tayinleyler ve arbiy bilgisini arttırmaq içün akademiyağa oqumağa yollaylar.

Oquvnı muvafaqiyetli bitire. Unvanı yukseltile. Kene cenk. Ardı-sıra koyler, qasabalar, şeerlerni biri-biri artından duşmandan azat eteler. Lakin ebet bu, qolaylıqnen olmay. Duşman qattı qarşılıq kosterip, çaresi olmağanından keri çekilmege mecbur ola. 1944 senesiniñ tek bir ayı içinde Abilovcılar 50-ge yaqın eali punktını duşmandan azat eteler.

Ogge keterek, Narva ozeni yanındaki uruşlarda kostergen cesürlikleri içün podpolkovnik Abilov Sovetler Birliginiñ Qaramanı unvanına taqdim oluna.

Boyle yüksek unvanğa taqdim etilgenlerniñ episi Qaraman Altın Yıldızını ala. Tek Abilov bu cedvelden silinip atıla. Daa doğrusı, oña orden berüvnen kifayetleneler.

Buña baqmadan Abilov oz arbiy boyun-borcunı şerefnen eda ete, galebe artından galebege irişe.

1945 senesiniñ baarinde o endi oz askerlerinen Oder ozenini keçüvde ve kerekli platdarmnı işğal etip, duşmanğa darbe endürüv, atta olarnıñ buyük qısımlarını sarımğa alıp, teslim olmağa mecbur etkeni içün tekrar, ekinci kere, kene Sovetler Birliginiñ Qaramanı unvanına taqdim oluna. Amma bu sefer de oña bu mukafatnı layıq kormeyler. Keçken sefer olğanı kibi, bu sefer de, endi dörtünci kere, Qızıl Bayraq ordeni berüvnen sıñırlanalar.

Abilov ve o komandirlik yapqan polk Oder ozeninden keçip, bir qaç şeerni daa azat ete ve cenkni Galebe bayramına bir qaç kun qalğanda Polşada bitire.

Boyleliknen Bobruysk, Slutsk, Baranoviçi, Brest, Dantsig, Strasburg, Görits kibi onlarnen şeerler Abilov komandirlik yapqan polknıñ askerleri tarafından azat etile.

Defalarca cenk meydanlarında aqransız qaramanlıqlar kostergenine baqmadan Fetislam Abilovğa Qaraman unvanını bermeyler.

Cenk bitken soñ da bir sıra arbiy komandanlarnıñ ve komandirlerniñ, şahsen Abilovnıñ ozü de yuqarı teşkilatlarğa muracaat etkenine baqmadan, butün ricalar cevapsız qala.

Tek aşkarlıq devirinde kene bir gruppa cenk iştiraqçileriniñ, SSSR(SSCB) halq deputatı K.Lubençenkonıñ areketleri sayesinde, SSSR(SSCB) Prezidenti M.S.Gorbaçovğa şahsen muracaat etilgen soñ, 1990 senesi Ulu Galabeniñ 45 yıllığında, niayet, oña Sovetler Birliginiñ Qaramanı unvanı aqlı surette berildi.

Boyleliknen, aytmaq mumkün ki, mukafat oz saibini buldı.
Fetislam Abilov şimdi Moskva vilayetiniñ Jukovskiy şeerinde yaşay.