Nasiat-Eskender Fazıl

Nasiat-Eskender Fazıl

Bar bizde evelden qalğan bir adet,
Onı red etkenniñ adına lanet!
Babalar bizlerni olsun dep yigit
Bereler şoyle bir nasiat-ogüt:

Muqaddes Vatannı sevmege biliñiz,
Halqtan iç ayrılmay, halq ile kulüñiz.
Ayatta aqiqat olsun çin yırıñız,
Yalannıñ qanatın tübünden qırıñız.

Alıñız qılıçnı ecelniñ qolundan,
Maqsadqa yetmeyip, qaytsın o yolundan.
Parlaq ayatçün talmañız kureşte,
Yigit dep, adıñız bilinsin er işte.

Ayatta insan ol, insanca yaşañız,
Tek elal emeknen elal aş aşañız.
Yigitniñ kureşte talmasın bilegi,
Olse de, hainlik yapmasın yuregi.

Mına şay ogrete bizlerni nasiat
İnsanda bir sevgi olmalı, bir ayat.
Onı red etkenge ebediy lanetler,
Yaşasın, olmesin bu kibi adetler!

Ogüt-Eskender Fazıl

Ogüt-Eskender Fazıl

Yigitim, dep urma yumruq kokregiñe,
Ağızıñ ile uçqan quşı tutsañ da.
Men-menlikni iç saqlama yuregiñde
Batırlarnıñ og safında tursañ da.

Vatañnı çin yurekten sevesiñmi,-
Halq içinde taqmaqlanma, maqtanma.
Hainlikni, duşmanlıqnı koresiñmi,-
Başqalarnıñ arqasına saqlanma.

Birevlerniñ azbarına taşlar atma,
Barıp tüşer baht-seadet bağına...
Halq adından bevtan-yalan sözler aytma-
Zeerdir bu Vatanımnıñ şanına.

Men erkesten yukseklerde turayım dep,
İnce, kuçsiz fidan dalğa tayanma...
Sevmegenge, urmetsizge dost eken, dep
Sırlarıñnı asıl açma, aldanma.

Yuregiñni coştır sen, alevlensin...
Nurlansın o, baht-seadet oğruna.
Vatan bilir, halqıñ korer, qalbiñ
Kulsin:
Boyle ogüt ana bergen oğluna...

Evelleri-Eskender Fazıl

Evelleri-Eskender Fazıl

Evelleri qalpaq kiygen genç qırımlar
Çoqraqlarğa, çeşmelerge can bergenler.
Çayırlarnı, derelerni, sırımlarnı
Bağ-bağçalar mekanına çevirgenler.

İçi-bağrı araretten yanğan insan
Qanıp-qanıp qaynar çoqraq suvun içken.
Bağçalarnı cennet sanıp-salıp iman
Faziletli ecdatlarğa dua etken.

Evelleri qırımlarda adet olğan:
Vatan içün yüregini parçalamaq...
Ecdatlardan nesillerge ogüt qalğan:
Ana-Yurtnı yat ellerden qorçalamaq.

Milliy qalpaq kiygen dülber yaş oğlanlar
Yaylalarda, çayırlarda yal alğanlar,
Bullür suvlu çoqraqlarnıñ etrafında
Horan tepken, Qaytarmağa oynağanlar.

Vatandaşlar, vaqıt keldi-uyanıñız,
Milliy urba kiymekten iç utanmañız:
Oz sıfatı, oz renki bar cesür halqımız,
Genç qırımlar, bunı asla unutmañız!


İyül 19.1997 s.